Grabatua xafla batetik paper gainean inprimatuz sortzen diren estanpa edo irudia da. Halaber, grabatu deitzen zaio irudi horiek sortzeko teknika eta arteari. Grabatuaren lehen pausoa xafla, plantxa edo matrizea egitea da, non irudia negatiboan osatzen den; matrize hori tindatuz paperean inprimatzen da, behin eta berriz gehienetan, matrizeko lanaren irudi positiboak eskuratuz. Grabatuan, artistak bere artelanaren nahi adina kopiak (bakarra ere bai) egin ditzake, eta horixe da beste artelanekiko bereizgarria.