Hurbileko Garapen Eremua, edo Garapen Hurbileko Eremua (edo Zonaldea) Lev Seminovitx Vigotski bielorrusiar psikologoak (1896-1934) ikaskuntzaren teoria konstruktibista sozialaren baitan landu zuen kontzeptua da, ikasleak une jakin batean duen ikasteko ahalmena adierazten duena. Vigotskiren arabera, ikasleak badu garapen erreal bat, berez eta inoren laguntzarik gabe burutu dezakeena, eta baita ere garapen potentziala, lagunduta lor dezakeena. Hurbileko Garapen Eremua garapen errealetik abiaturik, une jakin batean, internalizazioaren bitartez, garapen potentzialak lor dezakeen ikaskuntza maila orekatua da, garapen erreala baino zabalagoa, baina aldi berean garapen potentzialaren mugak aintzat hartzen dituena. Prozesu hau dinamikoa da ordea, eta kanpoko ekintza, harreman eta egoeren internalizazio prozesuek garapen potentzialaren muga berriak jar ditzakete, Hurbileko Garapen Eremua zabalduz horrela.
Beste hizkuntzetan: gaztelaniaz, Zona de Desarrollo Próximo.