Ziberfeminismoa Internet genero-borrokarako gune gisa bultzatzen duen mugimendua da, feminismoaren baitan, bereziki Internet parte hartze horizontalerako eskaintzen dituen aukerak profitatuz. 1990 hamarkadan sortu zen, zehatzago Australiako VNS Matrix kolektiboak plazaratutako manifestuaren ildotik. Besteak beste, cyborg delakoaren figura aldarrikatu du, gizakiaren eta makinaren arteko hibridoa, nortasun maskulino edo femeninorik gabe eta beraz genero-bereizketatik at dagoena.