Zilizioa

Zilizioa (latinezko cilicium hitzetik) jantzi latza da, atorra edo gerriko modukoa, abereen ileaz egindakoa, kristau fedean aszetismorako erabiltzen dena, penitentzia eta mortifikazio tresna moduan. Zilizioak eragindako deserostasuna areagotu eta oinazeak sorrarazteko, iltzez edo burdin hariz egindako gerrikoak gaineratu ziren. Kristautasunaren lehenengo mendeetatik erabiltzen da, eta Erdi Arotik ordena erlijioso batzuek bereganatu zuten. Metafora moduan, nork bere buruari ezartzen dion zigorra izendatzeko ere erabiltzen da.